L-ilsien huwa essenzjali fl-iżvilupp intellettwali, emozzjonali u soċjali ta’ kull individwu. Il-Malti mhux biss jiġbor fih identità lingwistika u kulturali iżda huwa għodda ta’ komunikazzjoni u interazzjoni. Permezz tal-Ilsien Malti l-individwu jista’ jesprimi dak kollu li jħoss u jkun kreattiv fil-messaġġ li jrid iwassal filwaqt li jkun espost għal oqsma oħra ta’ tagħlim. Il-Malti huwa lsien ħaj li ssawwar mill-poplu Malti u għadu qiegħed jissawwar biex jibqa’ għodda ta’ kreattività għal kull min jużah.